Pertsonaren eta exoeskeletoaren arteko interakzioa miatzeko proiektua

Tekniker eta Tabakaleraren arteko hirugarren lankidetza pertsonen eta roboten arteko interakzioan oinarrituko da. Oraingoan, gorputz-euskarriko makinetan, esaterako, exoeskeletoetan, eta erabiltzaileekin sortu behar den konfiantzazko harremanean.

Proiektua Creative Impact Research Centre (CIRCE) programaren barruan dago. Tabakalerak programa horretan parte hartzen du Alemaniako gobernuak hautatu ondoren kultura- eta sorkuntza-sektoreari laguntzeko politiken arloko ikerketa-zentro eta -laborategi gisa.  CIRCE Europako gogoeta-talde bat da, Alemaniako Gobernu Federaleko Kultura eta Hedabide Ministerioak (BKM) finantzatua, Europako Batzordearen Brexitera Egokitzeko Erreserbaren funtsekin.

Programa hori abian jarrita, Tabakalerak 300.000 euro jasoko ditu 2023an lau proiektu egiteko. Proiektu horiek, praktika artistikoaren bidez, artisten eta erakunde ez-kulturalen arteko lankidetza-metodologia bat proposatuko dute. Teknikerrez gain, Basque Culinary Center Innovation, Donostia International Physics Center (DIPC) eta Basque Center on Cognition, Brain and Language (BCBL) erakundeekin batera garatutako ekimenak ere aukeratu dira.

Proiektuak Tabakalerako ekitaldi batean aurkeztu dira. Ekitaldian parte hartu dute Edurne Ormazabal eta Clara Montero Tabakalerako zuzendari nagusiak eta kultura-zuzendariak, hurrenez hurren; Teresa Koloma, CIRCEko arduradunak; Ricardo Díez Muiño, DIPCko zuzendariak; Begoña Rodríguez, BCC Innovation-eko zuzendariak; Manuela Rizzoli, BCBLko ikertzaileak, eta Luis Uriarte, Teknikerreko zuzendari nagusiak.

Pertsona, erdigunean

Luis Uriartek azaldu duenez, Tekniker eta Tabakaleraren arteko hirugarren lankidetzak pertsona baten eta mugikortasuna ematen dion robot exoeskeletoaren arteko komunikazio eta harreman estu, ia sinbiotikoaren alderdiak aztertuko ditu. Exoeskeletoek babesa eta laguntza eskaintzen dute pertsonen mugimenduetarako edo mugimendu horiek indartzeko. Proiektuaren helburuak, Amaia Vicente artistarekin lankidetzan garatutakoak, zentzumen anitzeko interfaze bat planteatzen du, roboten eta horien erabiltzaileen arteko interakzioa hobetzeko.

Modu zabalagoan hartuta, Teknikerrek robotika kolaboratiboaren eta adimen artifizialaren esparruan lantzen duen helburu bat da, pertsona garapen-prozesuaren erdigunean jartzen duena.

Bestalde, Future Storage, DIPC eta Tabakaleraren artean gauzatuko duten proiektuak, biltegiratze digitalaren etorkizuna eta haren inplikazio ekosozialak eta lurraldekoak ikertzen ditu. Marina Otero arkitektoak, Harvardeko Unibertsitatearekin, Eduardo Bendek NASAko ingeniariarekin eta Donostia International Physics Centerrekin lankidetzan, datuekin, horien produkzioarekin, kontsumoarekin eta kontserbazioarekin dugun harremana birdiseinatzen duten eredu esperimentalak planteatzen ditu, biltegiratzearen ondoriozko informazioaren eta kanpo-efektuen aniztasuna kontuan hartuta.

Bien bitartean, Manuela Ruzzoli BCBLko ikertzailea eta Laura MM diziplina anitzeko artista elkarlanean arituko dira adimen artifiziala eta neurozientzia esperientzia paregabe bat sortzeko erabiltzen dituen erakusketa berritzaile eta esperimental batean. Ikuslearentzat ustekabekoa eta harrigarria den artea sortzeko adimen artifiziala nola erabil daitekeen miatzea da helburua, BCBLn ikertutako "igurikimenaren urraketaren" teorietan oinarrituta. Tabakalerako erabiltzaile batzuek sorkuntza-prozesuan parte hartu ahal izango dute, proiektuak garun-seinalea atzemateko Medialaben garatutako hardware libreko proposamen bat izango baitu.

Etorkizuneko janaria

BCC Innovation, Basque Culinary Centerreko gastronomia-zentro teknologikoaren eta Tabakaleraren arteko lankidetza Food Fictions proiektuan oinarrituko da. Proiektu horrek artearen munduko hainbat sortzaile inplikatuko ditu, eta zentro teknologikoko sukaldariekin batera etorkizuneko janaria irudikatuko dute, eta kultura-, ingurumen- eta gizarte-arloetan dituen inplikazioak. Proiektuak mundu sentsorialean jarriko du arreta, zentzumen desberdinak estimulatzeak jaten duguna hautemateko moduan nola eragin dezakeen ikertzen.

Artea, Zientzia, Teknologia eta Gizartea lerroaren esparruan urtean zehar artistek eta erakundeek egindako lana bistaratzeko eta herritarrekin partekatzeko, Tabakalerak erakusketa handi bat antolatuko du azaroan, urtean zehar garatutako proiektu guztien erakusketa bat bilduko duena. 

Informazio gehiago prentsa-oharrean.

PDF deskarga